坊間占星書多到眼花繚亂，質素參差，啱唔啱自己程度又係另一回事。呢篇文精選了幾本由入門查字典式嘅工具書，到進階理解宮位及行運嘅參考書。如果你搵緊參考書，希望呢個書單幫到你。

1. 《當代占星研究》 The Contemporary Astrologer’s Handbook by Sue Tompkins

占星是一套象徵語言，初學占星，難免到十二星座、十大行星、十二宮位等，以及星座的元素、形態等一大堆抽象詞彙感到迷惘。雖然互聯網已有大量資料可供查閱，但碎片化的資訊容易令人愈學愈亂。如果要選一本給初學者的 cookbook 占星書，我會揀 Sue Tompkins 的《當代占星研究》，深入淺出介紹占星的基本概念，如果想查白羊座係點？金星天秤座又代表咩？這書也很適合「查字典式」的用法。

睇完《當代占星研究》,對基本符號有咗初步理解之後,下一步就係要學點樣將呢啲符號串連成故事：包括宮位嘅深層意義、行運點樣影響人生、以及點樣做預測。以下幾本,係我認為進階學習必讀嘅參考書。

2.《占星十二宮位研究》 The Twelve Houses by Howard Sasportas

如果話《當代占星研究》係查星座同行星嘅字典，呢本就係查宮位嘅字典。Howard Sasportas 逐個宮位講解,唔止講表面意思，仲會帶出每個宮位背後嘅心理意義——例如第八宮唔只係「性同死亡」，而係關於點樣放低控制、經歷轉化。呢本書出版三十幾年都仲係宮位研究嘅定案之作，適合已經識基本概念、想再深入理解宮位嘅人。

3.Saturn in Transit by Erin Sullivan

專門講土星行運嘅一本書。Erin Sullivan 用神話同榮格心理學嘅角度，解釋土星點解成日同「限制」、「責任」呢啲字掛鈎，但佢真正嘅功能其實係幫你打好根基。如果你正經歷土星回歸，或者呢排流年土星啱啱行過你嘅重要位置，感覺壓力好大又唔知點解，呢本書會幫到手。

4.The Gods of Change by Howard Sasportas

同一個作者，呢次講嘅係外行星 －－天王星、海王星、冥王星－－行運帶嚟嘅衝擊。書名雖然係「轉變之神」，但內容更似係一本「危機處理指南」：點解生命總會喺某啲時刻突然崩塌，又點樣理解呢種崩塌其實係轉化嘅開始。同《占星十二宮位研究》相輔相乘，一本講靜態結構，一本講動態衝擊。

5.The Changing Sky – Learning Predictive Astrology by Steven Forrest

如果你已經識睇本命盤，想再進一步學運勢推算：即行運（transit）、推運（progression），呢本書係好嘅入門。Steven Forrest 提出「老師」與「搗蛋鬼」（Teacher/Trickster）嘅框架去理解外行星行運，寫法清晰又唔悶，尾段仲教你點樣將唔同技巧綜合成一個完整嘅故事，而唔係逐粒逐粒零散咁解讀。

如果你想學懂睇自己的星盤，可以考慮上我的占星初階課程。